काभ्रेमा फस्टाउँदैछ वेश्यावृत्ति

काठमाडौंका आपराधिक गिरोह पनि अब काभ्रेमा
बनेपा, १३ फागुन
राजधानी काठमाडौंमा कर्डाई हुँदै गएपछि पछिल्लो समयमा काभ्रेमा वेश्यावृत्ति फस्टाएको छ । केही दिनभित्रै प्रहरीले वेश्यावृत्तिमा संलग्न दर्जनौं व्यक्तिलाई पक्राउ गरेपछि काभ्रेको बनेपामा वृश्यावृत्ति फस्टाउँदै गएको प्रमाणित भएको हो । काभ्रेको बनेपामा रहेका केही गेष्ट हाउस र बनेपा वपिरि रहेका क्याविन रेष्टुरेन्टहरुमा वेश्यावृत्ति गराइने गरिएको चाल पाएरपछि प्रहरीले पछिल्लो समयमा सक्रियता बढाएको छ ।

हुन त प्रहरीलाई काभ्रेमा यस्ता गलत क्रियाकलाप हुने गरेको थाहा नभएको होइन । तर, होटल सञ्चालकसँग पैसा लिएर केही थाहा नपाएको जस्तो गर्ने प्रहरी प्रशासनले अहिले सक्रियता देखाएको छ । यो बनेपाबासीका लागि मात्रै होइन काभ्रेबासीका लागि पनि खुसीको कुरा हो । काभ्रेली डटकमलाई प्राप्त जानकारीअनुसार बनेपाका केही नाम चलेका होटलमा समेत वेश्यावृत्ति गराइने गरिएको छ । खाजा र नास्ता पसलको रुपमा सञ्चालन गरिएका ती होटलहरुमा गोप्य कोठा राखी दिउँसै वेश्यावृत्ति गराउने पाइएको प्रहरी स्रोतको दाबी छ । 'बनेपामा चलेका भनिएका होटलमा समेत गैरकानुनीरुपमा यस्ता काम गराएको पाइएको छ' इलाका प्रहरी कार्यालय बनेपा स्रोतले काभ्रेली डटकमसँग भन्यो, 'अब हाम्रो अनुसन्धानबाट ती होटलसमेत उम्कँदैनन् ।'

यसअघि बनेपाको इलाका प्रहरी कार्यालयको प्रमुखको रुपमा रहेका ऋषिकान्त पाण्डेको सरुवा भएपछि बनेपा आएका प्रहरी निरीक्षक रुपक खड्काले आफू आएको केही दिनभित्रै यस्तो कामको सुरुवात गरेका छन् । स्थानीय व्यापारीसँग पैसा खाएर केही काम नगरेको आरोप लागेको पाण्डेेले आफू बसेको एक वर्षम्म पनि कुनै पनि गेष्टहाउस र होटल छापा मार्न सकेका थिएनन् ।

राजधानी काठमाडौंमा राती अबेरसम्म रेष्टुरेण्ट तथा होटलहरु खोल्न नपाइने भएपछि काठमाडौंका होटलमा वेश्यावृत्ति गर्नेहरुका लागि काभ्रे आकर्ष थलो बन्न थालेको छ । स्रोतका अनुसार काभ्रेमा तीन किसिमबाट वेश्यावृत्ति हुने गरेको छ । पहिलो, यही सडकमा पाइने केटीहरुलाई लिएर होटलमा लगेर यौनजन्य क्रियाकलाप गर्नेको संख्या ठूलै रहेको छ । दोस्रो, बाहिरबाट केटी लिएर आउने केटाहरुले समेत यहाँ वेश्यावृत्तिलाई मलजल गरिरहेका छन् । प्रहरी स्रोतका अनुसार, यहीँका कतिपय होटलहरुले केटीलाई होटलमै काम दिएर वेश्यावृत्ति गराउने गरेका छन् ।

अपराधी काभ्रेतिर
राजधानी काठमाडौं असुरक्षित भएपछि काठमाडौंमा अपराध गरेर सुरक्षाका लागि काभ्रे आउनेको सँख्या पनि पछिल्लो समयमा बढेको छ । अचेल बनेपामा दिउँसै पेस्तोल बोकेर बजारमा हिँड्नेहरुको संख्या प्रशस्तै देखिएको छ । तर, प्रहरीको ध्यान त्यतातिर अझै पुग्न सकेको छैन ।

काठमाडौंमा विभिन्न गोलीकाण्ड मच्चाएर काभ्रे आएका अपराधीहरु केही समय यहीँका गोप्य स्थानमा लुकेर बसेका भए पनि अचेल खुलेआम हिँड्न थालेका छन् । यसरी आपराधिक क्रियाकलापमा लागेकाहरुको संख्या बढ्दै गएपछि यहाँका स्थानीयबासीले भने सुरक्षित महसुस गर्न सकेका छैनन् ।