एकीकृत माओवादीका जिल्ला सदस्यमाथि कुटपिट

रामेछाप,१३ फागुन
एकीकृत माओवादी रामेछापका जिल्ला कमिटिका सदस्य एवम् नेपाल रेडक्रस रामेछापका सभापति रामबहादुर कार्कीलाई ०६६ फागुन १० गते उनकै गाउँ सुनारपानी गाविसमा स्थानीय गाउँलेहरूले कुटपिट गरी घाइते बनाएका छन् ।

सुनारपानी गाविसमा फागुन १० गते गाविसले आयोजना गरेको गाउँको योजना तर्जुमा बैठमा माओवादीको तर्फबाट सहभागी भएका कार्की र माओवादी बाहेकका अन्य पार्टीका स्थानीय गाउँलेबीच योजनाका बारेमा विवाद भएको थियो । विवादका क्रममा कार्कीले स्थानीय युवाहरूलाई हातपात गरेपछि गाउँलेहरूले उनलाई कुटपिट गरेको गाउँलेहरूको भनाइ रहेको छ भने कार्की पक्षको भने आफूलाई सुनियोजितरूपमा आक्रमण गरिएको आरोप लगायो । कुटपिटबाट घाइते भएका कार्कीलाई १० गते नै प्रहरीले मन्थली ल्याएको थियो ।

उनलाई थप उपचारको लागि फागुन ११ गते काठमाडौँ लगिएको छ । कुटपिटमा संलग्न भएको आरोपमा प्रहरीले सुनारपानी गाविसबाट एमाले निकट अनेरास्ववियुका कार्यकर्ता राजु कार्कीलाई गिरफ्तार गरी हिरासतमा लिएको छ ।
नवराज पथिक