तराईमा आज होली

काठमाडौं ,१७ फागुन
आपसी मेलमिलाप र सदभावको सन्देशका साथ होली पर्व सोमबार तराई क्षेत्रमा परम्परागत रूपमा विभिन्न रङ, अविर र लोला खेली मनाइदैछ । पहाडी क्षेत्रमा भने आइतबार होली मनाईएको थियो । सडक, गल्ली, चोक र घर-घरमा आफन्त र साथभाइसँग रङ छ्यापेर तथा अविर दलेर होली मनाउनेहरु प्रशस्त देखिन्छन् ।

होलीका अवसरमा विभिन्न संघसंस्थाहरुले शुभकामना आदान प्रदान र साँस्कृतिक कार्यक्रम आयोजना गरेका छन् ।होली पर्वका उपलक्ष्यमा सरकारले सार्वजनिक बिदा दिँदै आएको छ ।

दैत्यराज हिरण्यकश्यपुले विष्णुभक्त आफ्ना पुत्र प्रहृलादलाई मार्ने उद्देश्यले ब्रहृमाबाट आगोले छुन नसक्ने वरदान पाएकी आफ्नी बहिनी होलिकालाई प्रहृलादका साथ दन्किरहेको आगोमा पस्न लगाउँदा होलिका आफै भष्म भएकी तर भक्त प्रहृलादलाई आगोले छुन नसकेको हिन्दु धर्मशास्त्रहरूमा उल्लेख छ । त्यसै बेलादेखि शक्तिको दुरूपयोग गर्ने पापी प्रवृत्तिकी प्रतीक बनेकी होलिका मारिएको उपलक्ष्यमा होली खेल्ने परम्परा चलेको मानिन्छ ।